చిన్న గొడవకి పెద్ద నిర్ణయం తీసుకోకండి… ప్రేమ అంతే లే

అసలు ఎక్కడ మొదలైంది? ఏంటా గొడవ? నిజంగా అంత పెద్ద విషయమా అది? ఇప్పుడు ఆలోచిస్తుంటే ఏమీ గుర్తురావట్లేదు. ఏదో చిన్న మాట. నువ్వా నేనా అన్న ఇగో. అంతే. ఆ క్షణంలో ఎందుకంత కోపం వచ్చిందో. నాకై నేనే ఏదో ఊహించుకున్నా. ‘నీకు నేనంటే లెక్కలేదు’, ‘ప్రతీసారి ఇంతే’, ‘ఇక నావల్ల కాదు’… మనసులో ఒకటే సినిమా. ఆవేశంలో ఫోన్ కట్ చేశా. ‘We are done!’ అని మెసేజ్ పెట్టేశా. అప్పుడు అనిపించింది, ‘హమ్మయ్య, ఏదో సాధించేశా’ అని. కానీ ఇప్పుడో? ఒకటే ఖాళీ.

నిజం చెప్పాలంటే, ఇప్పుడు చాలా బాధగా ఉంది. ఆ క్షణంలో నాది తప్పని ఒప్పుకోవడానికి నా అహం అడ్డొచ్చింది. ఎదుటివాళ్లు ఎంత బాధపడతారో అని ఒక్క క్షణం కూడా ఆలోచించలేదు. గొడవ పడినప్పుడు మనం మాట్లాడే మాటలకి, తీసుకునే నిర్ణయాలకి అస్సలు పొంతన ఉండదు. అంతా అయిపోయి, ఒంటరిగా కూర్చున్నప్పుడే అసలు విషయం నెత్తికెక్కిద్ది. ‘అయ్యో, అనవసరంగా అలా అనేశానా?’,

‘పాపం, తను ఎంత ఫీల్ అయ్యిందో?’ అని మనసు గిలగిలా కొట్టుకుంటుంది. ఆ తర్వాత వచ్చేదే అసలైన శిక్ష. పశ్చాత్తాపం.

మనం ప్రేమించే మనుషులతోనే గొడవ పడతాం. ఎందుకంటే వాళ్లపై మనకు హక్కు ఉంటుందనుకుంటాం. వాళ్లు మనల్ని అర్థం చేసుకుంటారన్న నమ్మకం. కానీ ఆ నమ్మకాన్నే మనం ఆయుధంగా వాడి, వాళ్ల మనసుని గాయపరుస్తాం. ఫోన్ తీసి ఒక్క ‘సారీ’ చెప్తే పోయేదానికి, మనసులో లేనిపోని గోడలు కట్టేసుకుంటాం. ఆ ఒక్క క్షణం మన ఇగోని పక్కనపెడితే, ఎంత అందమైన బంధం నిలబడుతుందో కదా?

ప్రేమంటే ఏంటి? ఎప్పుడూ నవ్వుతూ, పువ్వులు ఇచ్చుకుంటూ, సినిమాకెళ్లడమేనా? కాదు. ప్రేమంటే ఒకరినొకరు భరించడం కూడా. ఒకరి కోపాన్ని ఇంకొకరు ఓర్చుకోవడం. ఒకరి తప్పుల్ని ఇంకొకరు క్షమించడం. ఎండపడ్డ చోటే నీడ విలువ తెలిసినట్టు, చిన్న చిన్న గొడవలొచ్చినప్పుడే ప్రేమలోతు అర్థమవుతుంది. ఆ చేదు అనుభవమే బంధాన్ని ఇంకాస్త తియ్యగా మారుస్తుంది.

ఆలోచించి చూస్తే, ఆ గొడవ తర్వాత తనెంతగా గుర్తొస్తుందో! తను నవ్వినప్పుడు బుగ్గపై పడే సొట్ట, నేను చెప్పే పిచ్చి జోకులకి కూడా పగలబడి నవ్వడం, నేను బాధలో ఉన్నప్పుడు ‘నేనున్నాలే’ అని భుజం తట్టడం… ఇవన్నీ గుర్తొచ్చినప్పుడు గుండెల్లో ఏదో తెలియని భారం. ఒక చిన్న గొడవకి ఇంత అందమైన జ్ఞాపకాల్ని దూరం చేసుకోవడం ఎంత మూర్ఖత్వం?

ప్రేమంటే అంతే. అదొక రోలర్ కోస్టర్ రైడ్. నవ్వులుంటాయి, ఏడుపులుంటాయి, కోపాలుంటాయి, అలకలుంటాయి. అన్నిటినీ దాటి ముందుకు వెళ్లడంలోనే అసలైన కిక్ ఉంటుంది. చిన్న గొడవలకి పెద్ద నిర్ణయాలు తీసుకుని, మంచి మనుషుల్ని దూరం చేసుకోకండి. ఒక్క క్షణం ఆగి, ఆలోచించండి. అవసరమైతే ఆ గొడవని మర్చిపోయి ముందు మీరే మాట్లాడండి. ఎందుకంటే, ఇగో గెలిస్తే… ప్రేమ ఓడిపోతుంది. ప్రేమ గెలవాలంటే, కొన్నిసార్లు మనం ఓడినా తప్పులేదు. కదా?